‘కాయ్ రాజా కాయ్’: విజయనగరం మేయర్ పీఠంపై బెట్టింగ్ల పర్వం!

విజయనగరం మేయర్ పీఠం ఎవరికి దక్కుతుందనే అంశంపై జిల్లాలో బెట్టింగ్లు జోరుగా సాగుతున్నాయి. వైఎస్సార్‌సీపీ మేయర్ స్థానాన్ని దక్కించుకుంటుందని ఒక వీరాభిమాని ఏకంగా ₹30 లక్షల పందెం కాయగా, వివిధ ప్రాంతాల్లో ₹1 లక్ష నుంచి ₹5 లక్షల వరకు బెట్టింగ్లు నడుస్తున్నాయి.2024 ఎన్నికల్లో పందాలు కాసి నష్టపోయిన అనుభవాలు ఉన్నా పందెం రాయుళ్ళు వెనక్కి తగ్గడం లేదు. కూటమిలోని సమన్వయ లోపం తమకు కలసివస్తుందని వైసీపీ శ్రేణులు భావిస్తుండగా, సొంత ఓటు బ్యాంకు, ప్రభుత్వ అభివృద్ధే గెలిపిస్తుందని టీడీపీ-జనసేన-బీజేపీ కూటమి ధీమాతో ఉంది. నిన్నటివరకు రేసులో వెనుకబడినట్లు కనిపించిన వైసీపీ కూడా ఇప్పుడు గట్టిగా పందాల్లోకి దిగడంతో పోటీ ఆసక్తికరంగా మారింది.

వైసిపి అభ్యర్థులను అత్యధిక మెజార్టీతో గెలిపించండి

శృంగవరపుకోట పట్టణ కేంద్రంలో ఎన్నికల ప్రచారంలో వైఎస్సార్ కాంగ్రెస్ పార్టీ జెడ్పీటీసీ,ఎంపీటీసీ అభ్యర్థులను అత్యధిక మెజార్టీతో గెలిపించాలని మాజీ ఎమ్మెల్యే కడుబండి శ్రీనివాసరావు ఓటర్లకు విజ్ఞప్తి చేశారు.పట్టణంలోని మన్సబ్ వీధి,మొండి వీధి,గౌరి వీధి,చొక్కా వీధి,కోట మీద,ప్రకాశం మార్కెట్ తదితర ప్రాంతాల్లో ఆయన విస్తృతంగా ఎన్నికల ప్రచారం నిర్వహించారు.వైఎస్సార్ కాంగ్రెస్ పార్టీ జెడ్పీటీసీ అభ్యర్థి పిన్నిశెట్టి నాగమణితో పాటు పట్టణ ఎంపీటీసీ అభ్యర్థులను గెలిపించాలని ప్రజలను కోరారు.ప్రజల సమస్యల పరిష్కారం,ప్రాంత అభివృద్ధి కోసం వైసిపి అభ్యర్థులకు తమ అమూల్యమైన ఓటు వేసి అండగా నిలవాలని కోరారు.రానున్న రోజుల్లో గ్రామగ్రామాన వైఎస్సార్ కాంగ్రెస్ పార్టీని మరింత బలోపేతం చేసి పార్టీ అధినేత వైఎస్ జగన్ మోహన్ రెడ్డిని తిరిగి ముఖ్యమంత్రిని చేసేందుకు ప్రతి ఒక్కరూ కృషి చేయాలని పిలుపునిచ్చారు.

పాఠశాలలో హెచ్‌ఎం అసభ్య ప్రవర్తన..?

విజయనగరం జిల్లా గరివిడి మండలం గదబవలస ప్రభుత్వ పాఠశాలలో విద్యార్థినుల పట్ల ప్రధానోపాధ్యాయుడు అసభ్యంగా ప్రవర్తించిన ఘటన కలకలం రేపింది. హెచ్‌ఎం తీరుపై ఆగ్రహం వ్యక్తం చేసిన విద్యార్థినుల తల్లిదండ్రులు, ఆయనను తక్షణమే విధుల నుంచి తొలగించాలని డిమాండ్ చేశారు. ఈ ఘటనపై సమగ్ర విచారణ జరిపేందుకు మండల విద్యాధికారి (M.E.O.) పాఠశాలకు చేరుకుని వివరాలు సేకరిస్తున్నారు.

ఫ్లైట్ టికెట్ల ధరల పెంపునకు చెక్: కొత్త రూల్స్ నోటిఫై చేసిన కేంద్రం

విమాన టికెట్ల ధరలు అసాధారణంగా పెరగకుండా నియంత్రించేందుకు కేంద్ర ప్రభుత్వం 'భారతీయ వాయుయాన్ అధినియమ్-2026' నిబంధనలను తాజాగా నోటిఫై చేసింది. బ్రిటిష్ కాలం నాటి పాత ఎయిర్‌క్రాఫ్ట్ చట్టం స్థానంలో వచ్చే ఈ కొత్త రూల్స్ 2027 జనవరి 1 నుంచి అమల్లోకి రానున్నాయి. పశ్చిమాసియా ఉద్రిక్తతల వల్ల ముడి చమురు ధరలు మారి ఛార్జీలు పెరుగుతున్న నేపథ్యంలో, ప్రయాణికుల ప్రయోజనాల దృష్ట్యా కేంద్రం ఈ నిర్ణయం తీసుకుంది. డిమాండ్ సమయాల్లో ఛార్జీల పెంపుపై సుప్రీంకోర్టులో విచారణ జరుగుతున్న తరుణంలో వచ్చిన ఈ నిబంధనలు ఏవియేషన్ రంగంలో పారదర్శకతను పెంచడమే కాకుండా, టికెట్ ధరలు విపరీతంగా పెరిగినప్పుడు ప్రభుత్వం నేరుగా జోక్యం చేసుకునే వెసులుబాటును కల్పిస్తాయి.

వాట్సాప్ ద్వారా ఈపీఎఫ్ఓ సేవలు లభ్యం

ఈపీఎఫ్ఓ 74వ వ్యవస్థాపక దినోత్సవం సందర్భంగా వాట్సాప్ సేవలను కేంద్ర కార్మిక మంత్రి మన్సుఖ్ మాండవీయ ప్రారంభించారు. పీఎఫ్ చందాదారులు తమ మొబైల్‌లో 8796441800 నంబరును సేవ్ చేసుకొని, 'హాయ్' అని మెసేజ్ పంపి పీఎఫ్ బ్యాలెన్స్, చివరి 5 లావాదేవీలు, పాస్‌బుక్ వివరాలను సులభంగా పొందవచ్చు. ఇకపై వాడకంలో లేని, రూ. 1,000 వరకు బ్యాలెన్స్ ఉన్న ఖాతాల్లోని నిధులను క్లెయిమ్ ఫైల్ చేయాల్సిన అవసరం లేకుండా ఆటోమేటిక్‌గా లబ్ధిదారుల ఖాతాల్లోకి బదిలీ చేయనున్నారు. ప్రస్తుతం 8 కోట్ల మందికి పైగా సభ్యులతో ఈపీఎఫ్ఓ వద్ద రూ. 32 లక్షల కోట్ల నిధి ఉందని మంత్రి వెల్లడించారు.

రష్యా సైన్యంలో విశాఖ యువకులు.. కాపాడాలని వేడుకోలు!

ఉపాధి కోసం రష్యా వెళ్లిన విశాఖకు చెందిన ఐదుగురు యువకులు అక్కడి సైన్యంలో చిక్కుకుపోవడం తీవ్ర కలకలం రేపుతోంది. వీరిలో ముగ్గురిని రెండు నెలల క్రితమే రష్యా-ఉక్రెయిన్ యుద్ధ క్షేత్రానికి పంపగా, నాటి నుంచి వారి ఆచూకీ తెలియక కుటుంబ సభ్యులు తీవ్ర ఆందోళన చెందుతున్నారు. మిగిలిన ఇద్దరిని కూడా మరో రెండు రోజుల్లో యుద్ధ రంగానికి పంపే ప్రమాదం ఉందన్న సమాచారంతో, తమను రక్షించి స్వదేశానికి తీసుకురావాలని సదరు యువకులు ఒక వీడియో ద్వారా ప్రభుత్వాలను వేడుకుంటున్నారు. విదేశాంగ శాఖ, కేంద్ర, రాష్ట్ర ప్రభుత్వాలు తక్షణమే స్పందించి తమ పిల్లలను సురక్షితంగా మాతృభూమికి రప్పించాలని బాధితుల కుటుంబాలు కన్నీరుమున్నీరవుతున్నాయి.

విజయ"నగరం" ఎవరిదీ..?

విజయనగరంలో పోలింగ్ మందకొడిగా సాగి 62.93% గా నమోదైంది. 62 డివిజన్ల పరిధిలో కొన్ని డివిజన్లలో క్రాస్ ఓటింగ్ జరిగిందనే ప్రచారం సాగుతున్నప్పటికీ, అది కూటమికే సానుకూలంగా మారుతుందనే అభిప్రాయం వ్యక్తమవుతోంది. మెజారిటీ స్వల్పంగా ఉన్నా విజయం కూటమి వైపే మొగ్గు చూపే అవకాశాలు కనిపిస్తున్నాయి.

ఇరాన్‌పై ట్రంప్ అణుదాడి...

ఇజ్రాయెల్ ప్రధాని బెన్యామిన్ నెతన్యాహు ఒత్తిడితో డోనాల్డ్ ట్రంప్ నేతృత్వంలోని అమెరికా ప్రభుత్వం కొద్దిరోజుల్లోనే ఇరాన్‌పై అణు దాడి (Nuclear Strike) చేసే అవకాశముందని ప్రముఖ అమెరికన్ పొలిటికల్ కామెంట్లర్, జర్నలిస్ట్ టక్కర్ కార్ల్సన్ 'X' (ట్విట్టర్) వేదికగా సంచలన ఆరోపణలు చేశారు. సెంట్రల్ ఇరాన్‌లో భూమికి 300 అడుగుల లోతులో ఉన్న 'పికాక్స్' (Pickaxe) పర్వతం కింది న్యూక్లియర్ ప్రాసెసింగ్ కేంద్రాన్ని ధ్వంసం చేయడానికి సాధారణ ఆయుధాలు సరిపోవని, అందుకే టాక్టికల్ న్యూక్లియర్ దాడిని ఎంచుకునేందుకు ట్రంప్ సుముఖంగా ఉన్నారని ఆయన పేర్కొన్నారు. ఇరాన్‌పై అణుదాడి జరిగితే అది మూడో ప్రపంచ యుద్ధానికి (World War III) దారితీస్తుందని కార్ల్సన్ తీవ్ర హెచ్చరికలు జారీ చేశారు.

బాలసుబ్రహ్మణ్యం పార్థివదేహానికి సీఎం చంద్రబాబు నివాళులు

విజయవాడలోని సిటీ పోలీస్ ఆర్మ్డ్ రిజర్వ్ (AR) గ్రౌండ్‌లో ఉంచిన విశ్రాంత ఐపీఎస్ అధికారి బాలసుబ్రహ్మణ్యం పార్థివదేహానికి ఆంధ్రప్రదేశ్ ముఖ్యమంత్రి నారా చంద్రబాబు నాయుడు నివాళులర్పించారు. ఈ సందర్భంగా ఆయన పార్థివదేహానికి పూలమాల వేసి శ్రద్ధాంజలి ఘటించారు. అనంతరం బాలసుబ్రహ్మణ్యం కుటుంబ సభ్యులను పరామర్శించి, తమ సానుభూతిని తెలియజేస్తూ వారిని ధైర్యపరిచారు.

అశోక్ బంగ్లా ఎదుట బిజెపి ధర్నా!

స్థానిక సంస్థల ఎన్నికల్లో పొత్తు ధర్మానికి గండి పడిందంటూ పూసపాటిరేగ మండలంలో రాజకీయాలు వేడెక్కాయి. పూసపాటిరేగ ఎంపీటీసీ-1 (రెల్లివలస) స్థానాన్ని కూటమి ఒప్పందంలో భాగంగా బిజెపికి కేటాయించినప్పటికీ, ఇక్కడ రెబెల్స్ బరిలోకి దిగడం వివాదానికి దారితీసింది.ఈ తిరుగుబాటు అభ్యర్థులకు వెనుక ఉండి తెలుగుదేశం పార్టీ నాయకులే మద్దతు ఇస్తున్నారని ఆరోపిస్తూ బిజెపి నాయకుడు పతివాడ రాజేష్ ఆధ్వర్యంలో పార్టీ శ్రేణులు ఈరోజు విజయనగరంలోని అశోక్ బంగ్లా ఎదుట ధర్నా నిర్వహించారు. రెబెల్స్‌ను తక్షణమే పోటీ నుంచి ఉపసంహరింపజేసి కూటమి ధర్మాన్ని నిలబెట్టాలని బిజెపి నేతలు డిమాండ్ చేశారు.

బాధితురాలిని పరామర్శించనున్న జగన్...

అనంతపురం జిల్లా రాప్తాడు పాఠశాలలో ఉన్మాది జరిపిన రంపపు దాడిలో తీవ్రంగా గాయపడి, బెంగళూరులోని మణిపాల్ ఆసుపత్రిలో చికిత్స పొందుతున్న 10వ తరగతి బాలికను వైఎస్సార్‌సీపీ అధినేత, మాజీ ముఖ్యమంత్రి వైఎస్ జగన్‌మోహన్‌రెడ్డి నేడు పరామర్శించనున్నారు. మధ్యాహ్నం 2:15 గంటలకు ఆస్పత్రికి చేరుకోనున్న ఆయన, వైద్యులతో సంప్రదించి బాలికకు అందుతున్న ప్రత్యేక వైద్య సేవలు మరియు ప్రస్తుత ఆరోగ్య పరిస్థితిపై ఆరా తీయనున్నారు. అనంతరం ఘటనతో తీవ్ర దిగ్భ్రాంతికి గురైన బాధితురాలి కుటుంబ సభ్యులను నేరుగా కలసి వారికి ధైర్యం చెప్పనున్నారు.

ఎర్రన్నాయుడు వర్ధంతి: ఘనంగా నివాళులు...

ఉత్తరాంధ్ర ప్రజా నాయకుడు, మాజీ కేంద్ర మంత్రి దివంగత కింజరాపు ఎర్రన్నాయుడు వర్ధంతి సందర్భంగా టీడీపీ వర్గాలు, అభిమానులు ఆయనకు ఘనంగా నివాళులర్పించారు. పార్లమెంట్‌లో అనర్గళ వాగ్ధాటితో తెలుగు ప్రజల సమస్యలను వినిపిస్తూ ఉత్తరాంధ్ర ఖ్యాతిని జాతీయ స్థాయికి తీసుకెళ్లిన ఆయన సేవలను నేతలు స్మరించుకున్నారు. నిరాడంబర జీవితం, ప్రజాసేవ పట్ల అంకితభావం, తెలుగుదేశం పార్టీ బలోపేతానికి ఆయన చేసిన కృషి చిరస్మరణీయమని పేర్కొన్నారు.